அமானுஷ்ய இடங்கள்

பான்கர்ஹ் கோட்டை (Bangarh fort)

இந்தியாவில் அமானுஷ்ய இடம் என்று சொன்னால் முதலில் நினைவிற்கு வருவது பான்கர்ஹ் கோட்டை. இக்கோட்டை ராஜஸ்தான் மாநிலத்தில் ஆல்வார் மாவட்டத்தில் உள்ளது. தலைநகர் ஜெய்ப்புரில் இருந்து சுமார் 52 கிலோமீட்டரில் அமைந்துள்ள இக்கோட்டை பல அமானுஷ்ய ஆய்வாளர்களின் ஆர்வத்திற்கு தீனி போடும் இடமாய் கருதப் படுகிறது. மேலும் இதைப் பற்றிய வட்டாரக் கதைகளினால், இதில் ஆர்வமுடையவர்கள் பலர் இக்கோட்டையை நோக்கி படையெடுத்து வருகின்றனர். 

மாலை நேர சூரிய அஸ்தமனத்திற்கு பிறகு இக்கோட்டைக்குள் செல்ல அனுமதி இல்லை என்று  Archeological survey of India கூறுகின்றது. 

பின்கதை:

இக்கோட்டை 17ஆம் நூற்றாண்டில், மான் சிங் என்பவரால் அவரது மகன் மாதவ் சிங்கிற்காக கட்டப்பட்டது. அவர்களின் வம்சாவளி இளவரசியான ரத்தினாவதி பேரழகி என்று போற்றப்படுபவள். அவளின் 18ஆம் அகவையில், அவளின் அழகிற்காகவே சுற்றுப்புற  ராஜ்ஜியத்தில் இருந்து பலர் அவளை மணம் முடிக்க கோரிக்கை விடுத்தனர் என்றும் சொல்லப்படுகிறது. அத்தகைய அழகியான ரத்தினாவதியின் அழகில் மயங்கி அவளை அடைய விரும்பினான் மந்திரவாதி ஒருவன். ஒரு நாள் அவள் சந்தைக்கு வரும்போது, வாசனை திரவியங்கள் விற்கும் வனிகனாக அவள் முன் தோன்றினான் அவன். ஒரு வாசனை திரவியத்தை அவள் முன் நீட்டி முகர்ந்து பார்க்கச் சொன்னான். அந்த வாசனை திரவியத்தில் வசிய மருந்தை கலந்து அவளை அடைவதே அவனின் திட்டம். ஆனால் இதை அறிந்த ரத்தினாவதி அந்த வாசனை திரவியத்தை அவன் அருகில் இருந்த கல்லின் மீது தூக்கி வீச, அந்த கல் உயிர் பெற்று பெரிதாகியது, அவனின் மந்திர சக்தியினால். அதில் வசிய மருந்து கலந்ததால், அந்த மந்திரவாதியின் வசியத்திற்கு  உட்பட்ட அந்த கல் மந்திரவாதியை அணைத்து (!!!) அவனின் இறப்பிற்கு காரணமானது. சாகும் தருவாயில் அந்த மந்திரவாதி ரத்தினாவதிக்கு சாபம் கொடுத்தான். அவளும் அவளின் மக்கள் அனைவரும் பசி, பஞ்சத்தால் இறந்து அக்கோட்டையிலேயே ஆவியாய் சுற்றுவர் என்றும் அவர்களுக்கு மறுஜென்மம் என்பதே கிடையாது என்பதும் அச்சாபம். அவன் இறந்த சில நாட்களிலேயே அவன் சாபம் பலிக்க, இன்னமும் அக்கோட்டையில் அவர்களின் ஆவிகள் சுற்றித் திரிவதாக கூறுகின்றனர்.

அதற்கடுத்த காலங்களில், பல்வேறு தரப்பினர் அக்கோட்டையை புணரமைக்க பணிகளை செய்தாலும், ஏதாவது தடங்கல் வந்து அக்காரியத்தை தடை செய்து கொண்டிருக்கிறது.

இன்னும் அங்கு வாழும் சொற்ப கிராமத்தவர்கள், அவர்களின் வீட்டில் மேற்கூரை கட்டுவதில்லை. அப்படி ஏதாவது ஒரு வீட்டில் மேற்கூரை கட்டினாலோ, கட்டியவுடன் இடிந்து விழுவதாகக் கூறுகின்றனர்.

இரவு அனுமதி இல்லாதபோதும், சிலர் ஆராய்ச்சிக்காகவும், சிலர் பந்தயத்திற்காகவும், பலர் புரளிகளை நம்பியும் அங்கு செல்கின்றனர். அப்படி இரவு நேரத்தில் அங்கு செல்பவர்களில், பலர் காணாமல் போகின்றனர். சிலர் திரும்பி வந்தாலும், மர்மமான முறையில் இறந்து போகின்றனர் என்றும் அங்கிருக்கும் மக்கள் கூறுகின்றனர்.

இதனை செய்வது அந்த மந்திரவாதியை பழி வாங்க காத்திருக்கும் ரத்தினாவதியின் ஆவியா…? உங்களின் கருத்து என்ன...

டெல்லி கன்டோன்ட்மெண்ட் (Delhi Cantonment)

படத்தில் வருவது போல், பேய் துரத்தும் காட்சி பார்க்க வேண்டுமென்றால், டெல்லி கன்டோன்ட்மெண்ட் தான் அதற்கு சரியான இடம். டெல்லியில் (அமானுஷ்யத்திற்கு) புகழ்பெற்ற இடமான கன்டோன்ட்மெண்ட், இரவு நேரத்தில் யாருமற்ற பாழடைந்த இடமாகவே காட்சியளிக்கின்றது. 

இரவு நேரத்தில், பைக்கில் வரும் பயணிகளிடம், வெள்ளை உடை அணிந்த பெண் ‘லிஃப்ட்’ கேட்பதாகவும், மறுப்பவர்களை அவர்களின் வண்டியை அதிவேகத்தில் பின்தொடர்ந்து சென்று பயமுறுத்துவதாகவும் கூறுகின்றனர். அவளிற்கு லிஃப்ட் தருபவர்கள், அதன்பின் காணாமல் போகின்றனர் என்றும் சொல்லப்படுகிறது.

இது இங்கு அடிக்கடி நடக்கும் நிகழ்வாக அங்கிருக்கும் மக்கள் கூறுகின்றனர். மேலும் இரவு நேரத்தில், ஏதோ ஒரு வகையில் (!!!) இறந்த பெண்ணின் ஆவி தான் அங்கு சுற்றுவதாக கூறுகின்றனர். 

உங்களுக்கு என்ன தோன்றுகிறது…? ஒரு வேலை நீங்கு அவ்வழியில் சென்று கொண்டிருக்கும்போது இவ்வாறு ஒரு பெண் லிஃப்ட் கேட்டால் என்ன செய்வீர்கள்…?

அக்ரேஷன் கி பயோலி (Agrasen ki Baoli)

மத்திய டெல்லியில் அமைந்துள்ள இந்த இடம் 108 படிநிலைகளைக் கொண்ட பிரம்மாண்ட நீர் தேக்கம் ஆகும். இது காலத்தால் அழியாமல் இருக்கும் நினைவுச் சின்னம். 15 மீட்டர் அகலமும் 60 மீட்டர் நீளமும் உள்ள இப்படிநிலைகள் மஹாபாரத காலக்கட்டத்தில் கட்டப்பட்டிருக்கலாம் என்று கூறப்படுகிறது.

இன்றும் வற்றாமல் இருக்கும் நீர், அங்கு செல்பவர்களின் மனதை வசப்படுத்தி, ஒரு வித மாயையைத் தோற்றுவித்து, அந்த நீரில் மூழ்கச் செய்வதாக சொல்லப்படுகிறது. காலை நேரத்தில் இங்கு செல்பவர்கள் கூட, அவர்கள் அனுபவத்தை பகிரும் போது மனதிற்கு மிகவும் படப்படப்பாக இருப்பதாகக் கூறுகின்றனர்.

இதுவும் அங்கிருக்கும் ஆவியின் வேலையோ...

டி மான்ட்டி காலனி  (De Monty colony)

சென்னையில் இருக்கும் அமானுஷ்ய இடம் என்றால் முதலில் நினைவிற்கு வருவது இந்த டி மான்ட்டி காலனி தான். இதைக் கொண்டு தமிழில் ஒரு படமும் வெளியானது.

19ஆம் நூற்றாண்டில், டி மான்ட்டி என்கிற போர்ச்சுக்கிசீய வணிகருக்கு சொந்தமானது இந்த காலனி. அதன்பின் அவரின் பெயரையே கொண்டு அழைக்கப்பட்டு வருகிறது. அவர்தம் வாழ்க்கை முழுவதும் துன்பத்தையே அனுபவித்ததாகக் கூறப்படுகிறது. அவரின் மனைவியும் மனநலம் பாதிக்கப்பட்டவராவார். அவர்களின் மகனும் சிறுவயதிலேயே சில கண்டறியப்படாத சூழ்நிலைகளினால் இறந்திருக்கிறார். இதனால் அவர் பெரிதும் பாதிக்கப்பட்டதாகக் கூறப்படுகிறது.

இப்போதும் இரவில் டி மான்ட்டி அங்கு நடமாடுவதாகவும், அடிக்கடி தாழ்ப்பாள் திறந்து மூடும் சத்தமும், ஆடும் நாற்காலியின் சத்தமும் கேட்பதாக அங்கு வசிப்பவர்களால் கூறப்படுகிறது.

இந்த காலனிக்கு வேலைக்கு வந்த காவலாளி அடுத்த நாளே மர்மமான முறையில் இறந்ததாகவும் கூறுகின்றனர். இத்தெருவிற்குள் நுழையும் செல்லப் பிராணிகள் கூட காணாமல் போவதாகக் கூறுகின்றனர். இதனாலேயே மக்கள் அந்த காலனியில் நுழைவதற்கே அஞ்சுகின்றனர்.

ஆனால் சிலரோ, அங்கு விளக்கு வெளிச்சம் இல்லாததும், சரியாக கவனிக்கப் படாமலும் இருப்பதாலேயே அந்த தெரு அமானுஷ்யமாக காட்சியளிப்பதாக கூறுகின்றனர்.

உங்களின் கருத்து என்ன…? உண்மையிலேயே டி மான்ட்டியின் ஆவி அங்கு உலவுவதாக நீங்கள் நம்புகிறீர்களா…?

 

ஹோட்டல் ஃபேர்ன் ஹில், ஊட்டி (Hotel Fern Hill, Ooty)

இது தமிழ்நாட்டில் உள்ள அடுத்த அமானுஷ்ய இடம். இந்த இடம் பாலிவுட் வரையிலும் பிரபலமானது என்றால் நம்புவீர்களா…

2002ஆம் ஆண்டு வெளிவந்த “ராஸ்” என்ற ஹிந்தி படத்தின் படப்பிடிப்பு ஊட்டியில் தான் நடந்தது. அப்போது இங்கு தான் படப்பிடிப்பிற்கு வந்தவர்கள் தங்கியிருந்தனர். அவர்களின் திகில் அனுபவத்திற்கு பின்பே அந்த ஹோட்டல் அமானுஷ்யத்திற்கு பிரபலமானது.

அடுத்த நாள் அதிகாலையில் பாடல் காட்சிகள் படமாக்கப்பட வேண்டி, அப்படத்தில் பணியாற்றிய நடன கலைஞர்கள் எல்லாரும் இரவு விரைவாக உறங்கச் சென்றனர். ஆனால் இரவு முழுவதும், முதல் தளத்தில் யாரோ நாற்காலிகளை நகர்த்தும் சத்தம் கேட்டுக் கொண்டே இருந்தது. தொடர்ந்து கேட்ட சத்தத்தினால், அவர்கள் தூங்க முடியாமல் தவித்தனர். வரவேற்பில் இருப்பவர்களுக்கு தொலைப்பேசியின் மூலம் தொடர்பு கொள்ளவும் முடியவில்லை. 

எப்படியோ அந்த இரவை தூக்கமில்லாமல் கழித்தவர்கள், அடுத்த நாள் காலை படப்பிடிப்பிறகு செல்லும்முன், ஹோட்டல் பணியாளர்களிடம் இதைப் பற்றிக் கூறினர்.

ஆனால் அதற்கு அந்த பணியாளர்கள் கூறியதைக் கேட்டவர்கள் உண்மையில்  பயத்தில் உறைந்து தான் போயிருப்பர். ஏனெனில், அந்த ஹோட்டலில் முதல் தளம் என்ற ஒன்று இல்லவே இல்லை!!!

அந்த சம்பவத்திற்கு பின், அனைவராலும் அமானுஷ்ய இடமாகக் பார்க்கப்பட்டதால், அந்த ஹோட்டல் சில காலத்திற்கு மூடிவைக்கப்பட்டிருந்தது.

கூடுதல் தகவல்… ராஸ் என்பது ஹாரர் படம் தான்… பேய் பட குழுவினருக்கே பேய் ஃஎபெக்ட் கொடுத்திருக்கிறது அந்த ஹோட்டல்…

ராமோஜி ஃபிலிம் சிட்டி (Rajini Film city)

பல தென்னிந்திய படங்களுக்கு படப்பிடிப்புத் தளமாக இருந்த (இருக்கின்ற) ராமோஜி ஃபிலிம் சிட்டி தான் அமானுஷ்ய இடங்களின் பட்டியலில், நாம் அடுத்து பார்க்கப் போகும் இடம்…

ஹாலிவுட்டின் யூனிவெர்சல் ஸ்டுடியோஸிற்கு நிகராகக் கருதப்படும், இந்த ராமோஜி ஃபிலிம் சிட்டியில் அங்கங்கு சில இடங்களில் அமானுஷ்ய நிகழ்வுகள் நிகழ்வதாகக் கூறுகின்றனர்.

இதற்கு காரணம், இந்த இடம் ஒரு காலத்தில், நிஜாம்களின் போர்க்களமாக இருந்திருக்கிறது. அதற்கு முன்னர் திருடர்கள் தாங்கள் திருடியதை பதுக்கும் இடமாக இருந்ததாகவும் கூறுகின்றனர்.

அங்கு இறந்து போன போர்வீரர்களின் ஆவிகள் அங்கு உலவுவதாக சொல்லப்படுகிறது. மேலும் சில நேரங்களில், கண்ணாடியில் உருது மொழியில் ஏதோ கிறுக்கல்களைக் காண்பதாகவும் கூறுகின்றனர்.  

ஒரு முறை அங்கு படப்பிடிப்பு நடக்கும் போது, வெளிச்சத்திற்காக விளக்குகளை பிடித்துக் கொண்டிருந்தவன், திடீரென்று அருகில் இருந்த ஹீரோவின் மீது விழுந்து விட்டானாம். அவனிடம் அது பற்றி விசாரித்தபோது, யாரோ பின்னாலிருந்து தள்ளி விட்டதானாலேயே அவன் விழுந்ததாகக் கூறினானம். ஆனால் அவன் அங்கு நின்றிருந்த சமயம், அவனிற்கு பின்னால் யாரும் இல்லை!!!

இவ்வளவு திகில் நிறைந்த ராமோஜி ஃபிலிம் சிட்டியில், நீங்கள் ஒரு இரவை கழிப்பீர்களா…?

த்ரீ கிங்ஸ் சர்ச், கோவா (Three Kings Church, Goa)

அமானுஷ்ய தேவாலயம்… இதைக் கேட்பதற்கு சற்று முரணாக இருக்கலாம்… ஆனால் உண்மையிலே இப்படி ஒரு தேவாலயம் கோவாவில் இருக்கிறது.

அதன் பெயர் தான், த்ரீ கிங்ஸ் சர்ச். கோவாவின் தென்பகுதியில் உள்ள கான்சாலிம் என்கிற கிராமத்திலுள்ள சிறு குன்றான க்யூலிமில் அமைந்துள்ளது இந்த தேவாலயம்.

இதன் கதையை தெரிந்துகொள்ள, காலனித்துவம் பின்பற்றப்பட்ட காலத்திற்குச் செல்வோம். அப்போது கோவா, போர்ச்சுக்கிசியர்களின் கட்டுப்பாட்டிற்குள் இருந்தது.

பெயருக்கேற்றார் போல இக்கதை மூன்று அரசர்களைப் பற்றியதே… அவர்களின் பேராசைப் பற்றியது. அம்மூன்று அரசர்களுக்கும் அவ்விடத்தை தானே ஆள வேண்டும் என்கிற எண்ணம் உருவாக, அந்த இடமும் அங்கு வாழும் மக்களும் மிகுந்த  போராட்டத்துடனே நாட்களைக் கழித்து வந்தனர்.

அப்போது, அம்மூவருள் ஒருவரான, அரசர் ஹோல்கர் ஒரு திட்டம் தீட்டினார். அதன்படி மற்ற இரு அரசர்களையும் சமரசம் பேச அழைத்தார். அவர்கள் தேர்ந்தெடுத்த இடமே இந்த தேவாலயம்.

அங்கு ஹோல்கர் மற்ற இருவருக்கும் விஷம் கலந்த உணவை பரிமாற, அவர்களும் இவரின் திட்டம் தெரியாமல் அதை உண்டு மடிந்தனர்.

அதில் பெருமகிழ்ச்சி அடைந்த ஹோல்கர், மக்களை ஒன்றுகூட்டி தன் வெற்றியைத் தெரிவித்தார். ஆனால் மக்களோ, அவரின் கொடூர செயலைக் கண்டு கொதித்தெழுந்தனர். இதனை எதிர்பார்க்காதவர், அவர்களிடமிருந்து தப்பிக்க மீண்டும் அந்த தேவாலயத்தை அடைந்தார்.

மக்களிடமிருந்து தன்னால் தப்பிக்க இயலாது என்பதை அறிந்தவர், மீதி இருந்த விஷத்தை அருந்தி தன் உயிரை மாய்த்துக் கொண்டார்.

அங்கு வந்த மக்கள், அம்மூன்று அரசர்களின் உடல்களை தேவாலயத்தை சுற்றியிருந்த இடத்தில் புதைத்தனர்.

அன்றிலிருந்து அந்த தேவாலயம், ‘த்ரீ கிங்ஸ் சர்ச்’என்று பெயர்பெற்றது.

இறந்தும் அவ்விடத்தின் மேலுள்ள மோகம் குறையாமல், அம்மூன்று அரசர்களின் ஆவியும் அவ்விடத்தில் உலவுவதாக அங்கு வாழும் மக்கள் கூறுகின்றனர். இரவானால், தேவாலயத்தின் உள்ளே பேச்சு சத்தம் கேட்பதாகவும் கூறுகின்றனர்.

இங்கிருந்து பார்த்தால் சூரியன் அஸ்தமிக்கும் காட்சி மிக அழகாக தெரியுமாம். ஆனாலும் அந்த இடத்திலுள்ள அமானுஷ்யத்தின் காரணமாக யாரும் அந்த நேரத்தில் அங்கு கூடுவதில்லையாம்.

உங்களுக்கு அங்கு சென்று சூரிய அஸ்தமனம் பார்க்க ஆசையா..?

வாஸ் வில்லா, பெங்களூரு (Vaz villa, Bangalore)

பெங்களூரு என்றால் நம் நினைவிற்கு வருபவை ஓங்கி உயர்ந்த கட்டிடங்களும், பல பன்னாட்டு நிறுவனங்களும், எந்நேரமும் பரபரப்பாக இருக்கும் சாலைகளும், அதில் ஓடும் மக்கள்கூட்டமும், ரம்மியமான சீதோஷ்ண நிலையும் தான்.

ஆனால் அங்கும் மக்கள் எவரும் செல்ல பயப்படும் அமானுஷ்ய இடங்களும் இருக்கின்றன.  அத்தகைய இடங்களில் ஒன்று தான் இந்த வாஸ் வில்லா எனப்படும் டெர்ரா வேரா.

இந்த வீடு, 1943ஆம் ஆண்டு வாஸ் என்பவரால் கட்டப்பட்டது. அவருக்கு இரு மகள்கள் இருந்தனர். 

வாஸின் மூத்த பெண் பியானோ ஆசிரியையாக பணியாற்றி வந்தார். 2002ஆம் ஆண்டு, அவர் அடையாளம் தெரியாத மர்ம நபரால், சரமாரியாக வெட்டி கொல்லப்பட்டு, அவ்வீட்டிலேயே புதைக்கப்பட்டார். இதன் பிறகு, சில நாட்களிலேயே வாஸின் இரண்டாவது மகள், அவ்வீட்டை விட்டு வெளியேறியிருந்தார். அவர் அங்கிருந்து செல்லும்போது அவர்களின் கார், பியானோ முதலிய விலைமிக்க பொருட்களை அங்கேயே விட்டுச் சென்றிருந்தார் என்பது குறிப்பிடத்தக்கது.

அதன்பின்பு அவ்வீட்டில் அடிக்கடி பியானோ சத்தமும், பெண்ணின் கதறல் சத்தமும் கேட்டுக் கொண்டு இருந்ததாக சொல்கின்றனர் அதனை ஆராய செல்பவர்கள், உள்ளே தலைகீழாக இருக்கும் சிலுவையும் (inverted cross), தலை துண்டிக்கப்பட்ட சிலைகளும்  இருந்ததாகக் கூறுகின்றனர். மேலும் உள்ளே சென்று புகைப்படம் எடுப்பவர்கள், வெளியே வந்து பார்க்கும்போது ஒன்று புகைப்பட கருவி செயலிழந்து இருக்குமாம், இல்லையென்றால் புகைப்படம் சிதைந்து இருக்குமாம்.

அந்த வீட்டை இடித்துவிட்டாலும், இன்றும் அங்கு அமானுஷ்ய நிகழ்வுகள் நடப்பதாகக் கூறுகின்றனர். 

குல்தாரா கிராமம், ராஜஸ்தான் (Kuldhara village)

‘பேய் கிராமம்’ என்று அழைக்கப்படும் இந்த குல்தாரா கிராமம், ராஜஸ்தான் மாநிலத்தில் உள்ள ஜெய்சால்மருக்கு அருகில் உள்ளது. இங்கு பலிவால் பிராமணர்கள் வாழ்ந்ததாகக் கூறுகின்றனர்.

1852ஆம் ஆண்டு குல்தாரா மற்றும் அதை சுற்றியுள்ள 84 கிராமங்களை சேர்ந்தவர்கள் திடீரென்று மறைந்து விட்டதாகவும், அவர்கள் எங்கு சென்றனர் என்று கண்டுபிடிக்க முடியவில்லை என்றும் கூறுகின்றனர்.

இதற்கான பின்கதை இதுவே…  அப்போது அப்பகுதியின் திவானாக இருந்தவர் சலும் சிங். அவர் அந்த சமூகத்தை சேர்ந்த ஒரு பெண்ணின் மீது காதல் வயப்பட்டு அவளைத் திருமணம் செய்து கொள்ள விரும்பியதாகவும், அதற்கு அச்சமூகத்தினர் மறுப்பு தெரிவித்ததாகவும் கூறுகின்றனர். இதனால் கோபமான திவான், அவரின் ஆசைக்கு உடன்படவில்லை என்றால், அவர்களிடமிருந்து அதிகமான வரி வசூலிக்கப்படும் என்றும், இன்னும் பிற தொல்லைகளுக்கு ஆளாகலாம் என்றும் மிரட்டியிருக்கிறார். தங்கள் சமூகத்தின் மரியாதை காப்பதற்காக அவர்கள் அக்கிராமத்தை விட்டு சென்று விட்டதாக கூறப்படுகிறது. அம்மக்கள் அங்கிருந்து செல்லும்போது, தங்கள் நிம்மதியைப் பறித்த அக்கிராமங்களில் இனி ஒருவர் கூட வாழ முடியாது என்ற சாபத்தை வழங்கியதாகவும் சொல்லப்படுகிறது.

இப்போதுவரை குல்தாரா கிராமம் யாரும் இல்லாமல் வெறிச்சோடி தான் இருக்கிறது. அங்கு செல்லும் மக்கள் மனதிலும், அவர்கள் அறியாமலேயே சோகம் குடிகொள்வதாகவும் கூறுகின்றனர்.

போனகாட் பங்களா (Bonacaud bungalow, Kerala)

அடுத்து நாம் செல்ல… இல்லை பார்க்கப் போகும் இடம் கேரளாவில் உள்ள போனகாட் பங்களா. கேரளா என்றாலே நினைவிற்கு வருவது பசுமையே… எங்கு திரும்பினாலும் பச்சை பசேலென்ற காட்சிகளை காணலாம். அப்படி ஒரு இடம் தான் அகஸ்தியர் மலை தொடர்களில் அமைந்துள்ள இந்த போனகாட் பங்களா.

இந்த பங்களா, பிரிட்டிஷ் ஆட்சி காலத்தில் கட்டப்பட்டதாக கூறப்படுகிறது. இதன் வடிவமைப்பும் அவர்களின் கட்டிட கலையை எடுத்துக் காட்டுவதாக அமைந்துள்ளது. காலையில் இதன் அழகைப் புகழ்பவர்கள், இரவு நேரத்தில் இந்த பக்கம் எட்டிக்கூட பார்க்க மாட்டார்களாம்.

பிரிட்டிஷ் ஆட்சி காலத்தில், இப்பகுதி பரந்து விரிந்த தேயிலை தோட்டத்திற்கு பிரபலமாக இருந்தது. எல்லாம் நன்றாக சென்று கொண்டிருந்த சமயம், இந்த பங்களாவிற்கு சொந்தமானவரின் குழந்தை இறந்து விட்டதாகக் கூறுகின்றனர். அந்த சம்பவத்திற்கு பிறகு, அந்த குழந்தையின் குடும்பத்தினரும் லண்டன் சென்று விட்டதாக சொல்லப்படுகிறது.

அன்றிலிருந்து அந்த பங்களாவில் அந்த குழந்தையின் நடமாட்டம் இருப்பதாக அங்கிருக்கும் மக்கள் கூறுகின்றனர். மேலும் இரவு நேரத்தில், கண்ணாடி உடையும் சத்தமும், குழந்தையின் அலறல் சத்தமும் கேட்பதாகக் கூறுகின்றனர்.

உண்மையிலேயே அந்த போனகாட்பங்களா, பேய் பங்களாவா… நீங்கள் என்ன நினைக்கிறீர்கள்…

ஷனிவார்வாடா (Shaniwarwada, Pune)

இது பேஷ்வாக்களின் கோட்டை. இக்கோட்டை 1730ஆம் ஆண்டு முதலாம் பாஜிராவ் காலத்தில் கட்டப்பட்டது. 13 மாடிகளைக் கொண்ட இக்கோட்டையின் சுவர்களில் இராமாயண, மஹாபாரத காட்சிகள் வரையப் பட்டிருக்கின்றன.

இக்கோட்டையின் பின்கதை சுருக்கம்…

முதலாம் பாஜிராவ்வின் மகன் நானாசாஹிப் பேஷ்வாவிற்கு மூன்று மகன்கள். முதல் இரு மகன்கள் இறந்து விட, அந்த பதவிக்கு வந்தார் அவரின் இளைய மகன் நாராயணராவ். 17 வயதிலேயே பதவிக்கு வந்த இளைய பேஷ்வா இவர்.

ஆனால் நாராயணராவ் பதவிக்கு வந்தது, அவரின் சித்தப்பா ரகுநாதராவ்விற்கு பிடிக்கவில்லை. அண்ணன் மகன்கள் இறந்த பின் அந்த பதவி தனக்கு கிடைக்கும் என்று கருதினார் ரகுநாதராவ். 

இப்படி இருக்க, நாராயணராவ்விற்கும் ரகுநாதராவ்விற்கும் அடிக்கடி பூசல்கள் வர ஆரம்பித்தது. தன் மூத்த அண்ணன் மறைவிற்கு ரகுநாதராவ் தான் காரணம் என்ற சந்தேகமும் நாராயணராவ்விற்கு இருந்தது.

ஒருமுறை கோபத்தில், ரகுநாதராவ்வை வீட்டுக்காவலில் வைக்க உத்தரவிட்டார் நாராயணராவ். இது பிடிக்காத ரகுநாதராவ்வின் மனைவி ஆனந்திபாய், அன்றைய கால கூலிப்படைகளான ‘கார்டி’ என்பவர்களின் உதவியை நாடினார்.

விழா நாள் அன்று அக்கோட்டையில் மக்கள் கூட்டமாக இருக்கும் நேரத்தில் அங்கு புகுந்து குழப்பத்தை ஏற்படுத்தினர் அந்த கார்டிக்கள். இதையறிந்த 17வயது நாராயணராவ் தன்னை காக்கவேண்டி, “காகா! மாலா வச்வா…” (சித்தப்பா! என்னை காப்பாற்றுங்கள்…) என்று கத்தியதாகக் கூறுகின்றனர்.

ரகுநாதராவ்விற்கு, நாராயணராவ்வை கொல்ல வேண்டும் என்ற எண்ணம் இல்லை… அதனால் அவரை சிறைப் பிடித்து வருமாறு கார்டிக்களின் தலைவனிற்கு, “நாராயணராவ் லா தாரா…” என்று செய்தி அனுப்பினார்… (தாரா என்றால் சிறைபிடி என்று அர்த்தம்)

ஆனால் ஆனந்திபாயோ அந்த செய்தியை “நாராயணராவ் லா மாரா…” என்று மாற்றி விட்டதாகக் கூறுகின்றனர். (மாரா என்றால் கொன்று விடு என்று அர்த்தம்)

கார்டிக்களும் நாராயணராவ்வை கொன்று பல பாகங்களாக பிரித்து ரகுநாதராவ்வின் முன் கொண்டு வந்ததாகவும் கூறுகின்றனர்.

அதன்பின் இந்த கோட்டை, 1828ஆம் ஆண்டு ஏற்பட்ட தீவிபத்தால் மிகவும் சேதமானது. அத்தீவிபத்தின் காரணம் என்னவென்று இன்று வரை தெரியவில்லை. தொடர்ந்து ஏழு நாட்கள் அணையாமல் எறிந்த தீ, ஏழாம் நாள் தான் அணைந்ததாகக் கூறுகின்றனர்.

இப்போதும் பௌர்ணமி இரவில் அங்கு சென்றால், “காகா! மாலா வச்வா…” என்ற அலறல் குரல் கேட்பதாகக் கூறுகின்றனர்.

முகேஷ் மில்ஸ் (Mukesh Mills, Mumbai)

நாம் அடுத்து பார்க்கப்போவது பல பாலிவுட் படங்களுக்கும், ஹிந்தி தொலைக்காட்சி நிகழ்சிகளுக்கும் படப்பிடிப்புத்  தளமாக இருக்கும் முகேஷ் மில்ஸ். மும்பையியுள்ள  கோலாபாவில் உள்ள இந்த ஆலை, பாழடைந்த கிடங்கு போல் காட்சி தருவதால், இங்கு செல்லும்போது இயல்பாகவே விசித்திரமான உணர்வுகள் எழுகின்றன.

1870களில் ஆரம்பிக்கப்பட்ட இந்த ஆலை 1980 வரை வெற்றிகரமாகவே சென்று கொண்டிருந்தது. 1980ல் நடந்த வேலைநிறுத்தப் போராட்டத்தால், சிறிது காலம் தற்காலிகமாக ஆலை மூடப்பட்டது. பின் நடந்த தீவிபத்தால், இப்போது இருக்கும் நிலைக்குத் தள்ளப்பட்டது.

அதன் பின் ஆலை மீட்டெடுக்கப்படாமல் இருந்தாலும், அதன் வெளிப்புறத் தோற்றத்தின் காரணமாக, பல பாலிவுட் படங்களின் படப்பிடிப்பு இடமாக மாறியது.

ஆனால் அங்கு நடக்கும் அமானுஷ்ய நிகழ்வுகளால், படப்பிடிப்பை சூரிய அஸ்தமனத்திற்குப் முன்பே முடித்துவிட்டு அனைவரும் கிளம்பிவிடுவார்களாம். சிலர் அங்கு வித்தியாசமான குரல்களை கேட்டிருக்கின்றனராம். பல சமயங்களில் அவர்களின் பொருட்கள் காணாமல் போகும் சம்பவங்களும் நிகழ்ந்திருக்கின்றனவாம். இதனாலேயே இரவில் இங்கு யாரும் இருப்பதில்லையாம்.

இங்கு நடந்த ஒரு அமானுஷ்ய நிகழ்வு… பிபாஷா பாசு, இங்கு அவரின் படம் ஒன்று படபிடிக்கப்பட்ட போது நிகழ்ந்ததை பகிர்ந்து கொண்டார்… அங்கு ஒரு குறிப்பிட்ட இடத்தில் மட்டும் அவரால் வசனங்களை சரியாக வழங்க முடியவில்லையாம். மற்ற இடங்களில் அந்த பிரச்சனை ஏற்படவில்லை என்று கூறுகிறார்.  யாரோ அவரை வசனங்களைக் கூற விடாமல் தடுப்பதைப் போன்று உணர்ந்ததாக கூறுகிறார்.

இதே போல் சிலர், தங்களுக்குள் பேசிக் கொண்டிருக்கும்போது, திடீரென்று மற்றவர் வேறு ஒருவரின் குரலில் பேசியதாகவும், குறிப்பிட்டுச் சொன்னால், ஒரு பெண் ஆண் குரலில் பேசியதாகவும் கூறுகின்றனர்.

இப்போது அந்த ஆலை, விழாக்களுக்காக முன்பதிவு (!!!) செய்யப்படுவதாகக் கூறுகின்றனர். மேலும் அங்கு சீரமைப்புப் பணி நடக்கப் போவதாகவும் கூறுகின்றனர்.

ராஜ்கிரண் ஹோட்டல் (Rajkiran hotel, Lonavala)

லோனாவாலா, மகாராஷ்டிராவின் பிரபலமான மலைவாசஸ்தலமாகும். மும்பை, புனே போன்ற முக்கிய நகரங்களில் உள்ள மக்களின் வாரயிறுதி நாட்களை செலவு செய்யும் இடமாகவும் உள்ளது. இங்குள்ள பசுமை காட்சிகளும், இனிய வானிலையும், இவ்விடத்தை சிறந்த சுற்றுலா தளமாக்கியிருக்கிறது.

இதனாலேயே இங்கு மூலை முடுக்குகளிலெல்லாம் ஹோட்டல்கள் உள்ளன. அவற்றுள் ஒன்று தான் இந்த ராஜ்கிரண் ஹோட்டல். பல அமானுஷ்ய நிகழ்வுகள் நிகழ்வதால், இந்த ஹோட்டல் புறநகர் பகுதியில், ஒதுங்கியிருப்பதாக யாரும் நினைக்க வேண்டாம். இந்த ஹோட்டல், நகருக்கு மத்தியில், முக்கிய இடத்தில் தான் அமைந்துள்ளது.

அந்த ஹோட்டலில் இருக்கும் ஒரு அறையில் தான் வித்தியாசமான நிகழ்வுகள் நடப்பதாக அங்கு தங்கிய விருந்தினர்கள் கூறுகின்றனர். அந்த அறை தரைத்தளத்தில், வரவேற்புக்கு பின்னால் இருக்கிறது.

 

அங்கு தங்கியவர்கள், இரவு நேரத்தில் போர்த்தியிருக்கும் போர்வையை யாரோ இழுப்பதாகவும், காலையில் முழித்து பார்க்கும்போது, காலருகில் வித்தியாசமாக நீல நிறத்தில் ஏதோ ஒளி தெரிவதாகவும் , தங்களை யாரோ கவனித்துக் கொண்டே இருப்பதாக தோன்றியதாகவும் கூறுகின்றனர்.

அந்த அறையில் யாரும் தங்க மறுப்பதால், அது நிரந்தரமாக மூடப்பட்டது என்று கூறுகின்றனர்.

இதுவரை நாம் கண்ட அமானுஷ்ய இடங்களில், அந்த இடம் அமானுஷ்யமாக இருப்பதன் காரணம் என்று ஒன்று கூறப்பட்டது. ஆனால் ராஜ்கிரண் ஹோட்டல் அறையின் அமானுஷ்யத்திற்கான காரணம் என்ன என்பது இதுவரை வெளியே தெரியவில்லை.

ஜட்டிங்கா கிராமம் (Jatinga village, Assam)

அசாம் மாநிலத்திலுள்ள இந்த ஜட்டிங்கா கிராமத்தின் மக்கள்தொகை 2500 மட்டுமே. ஆனால் இக்கிராமம், ‘பறவைகள் தற்கொலை’ என்ற இதுவரை  காரணம் கண்டறிய இயலாத ஒரு நிகழ்வுக்கு உலகளவில் பிரபலமானது.

பருவக்காலத்தில் இடம்பெயரும் பறவைகள், இக்கிராமத்தின் குறிப்பிட்ட இடத்தில் அவைகளாகவே கீழே விழுந்து செத்து மடிவதாகக் கூறுகின்றனர். அதுவும், செப்டெம்பர் – அக்டோபர் மாதங்களில், அமாவசைகளில், குறிப்பாக மாலை 6 மணியிலிருந்து 9.30 மணிக்குள் இச்சம்பவம் நடைபெறுவதாக அங்குள்ளவர்கள் கூறுகின்றனர்.

கடந்த நூறாண்டு காலமாக ஒவ்வொரு வருடமும் இந்த நிகழ்வு தொடர்ந்து நடப்பதாகக் கூறுகின்றனர். அறிவியலாளர்கள் இந்த நிகழ்வின் காரணமாக பல கோட்பாடுகளையும் வாதங்களையும் முன்வைத்தாலும், இதுவரை எதுவும் நிரூபிக்கப்படவில்லை.

உங்களுக்கு இந்த ‘பறவைகளின் தற்கொலை’ சம்பந்தமாக ஏதேனும் காரணங்கள் தோன்றுகிறதா…?

ஜி. பி பிளாக் (GP Block, Meerut)

உத்தரபிரதேச மாநிலத்திலுள்ள மீரட், பழமையான நகரமாகும். அங்குள்ள ஜிபி பிளாக் என்னும் இடம் பாழடைந்து, சுவர்கள் சிதைந்து, காட்டுச் செடிகளும் முட்புதர்களும் படர்ந்து, இரவில் பார்ப்பதற்கு சற்று அமானுஷ்யமாகவே காட்சியளிக்கிறது.

அங்குள்ளவர்கள் அந்த இடத்தில் பேய் நடமாட்டம் உள்ளதாக கூறுகின்றனர். மேலும், அந்த கட்டிடத்தின் மாடியில் ஒரு பெண் அமர்ந்திருப்பது போலவும், சிவப்பு வண்ண உடையில் அந்த கட்டிடத்தில் ஒரு பெண் உதவுவது போலவும், நான்கு ஆண்கள் அங்கு அமர்ந்து குடிப்பது போலவும் தெரிவதாக அங்குள்ளவர்கள் கூறுகின்றனர்.

இது போன்ற நிகழ்வுகளால் அந்த இடம் அமானுஷ்யமாக இருக்கலாம் என்று நம்பப்படுகிறது. பல அமானுஷ்ய ஆராய்ச்சியாளர்கள் அங்கு சென்று ஆய்வு நடத்தியதாகவும் கூறுகின்றனர்.

ஜிபி ப்ளாக்கை பற்றிய வேறு செய்தி….

ஜிபி பிளாக் என்பது எந்தவொரு தனி நபருக்கும் சொந்தமானது அல்ல. அது இந்திய பாதுகாப்பு படையினருக்கு சொந்தமானது. 1950களில்  இராணுவத்தினர் தங்களில் அலுவலகத்தை வேறு இடத்திற்கு மாற்றிக் கொண்டனர். அதன்பின் அந்த இடத்தை பராமரிக்க சிறப்பு கவனிப்பாளர்களை அவர்கள் நியமித்தனர். ஆனால் அவர்களோ தங்கள் சுயலாபத்திற்காக அந்த இடத்தை, சில மணி நேரங்கள் மட்டும் இளம் ஜோடிகளுக்கும், ரௌடிகளுக்கும் வாடகைக்கு விட்டு அதன் மூலம் பணம் சம்பாதித்தனர். இதையறிந்த இராணுவத்தினர் அவர்களை வேலையை விட்டு நீக்கி, அந்த கட்டிடத்திற்கு பெரிய இரும்பு கதவு அமைத்து அக்கட்டிடத்தை அடைத்து வைத்ததாகக் கூறுகின்றனர்.

டுமாஸ் கடற்கரை (Dumas beach, Gujarat)

அரபிக் கடலோரம் அமைந்துள்ள அழகிய கடற்கரை தான் டுமாஸ் கடற்கரை. இந்த கடற்கரை இரு விஷயங்களுக்கு பிரபலமானது. ஒன்று அங்கிருக்கும் கருமண்… மற்றொன்று அங்கு நிகழும் அமானுஷ்ய நிகழ்வுகள். 

அங்கு நிகழும் அமானுஷ்யங்களுக்கு முக்கிய காரணமாக சொல்லப்படுவது, முன்பொரு காலத்தில் அக்கடற்கரை, இறந்தவர்களை புதைப்பதற்காக பயன்படுத்தப்பட்டிருக்கிறது.

காலையில் சூரத்தின் முக்கிய சுற்றுலா தலமாகத் திகழும் டுமாஸ் கடற்கரை, மாலை வேளையிலேயே வெறிச்சோடிக் காணப்படுகிறது. இரவு நேரத்தில் அங்கு இருப்பதற்கு யாரும் தயாராக இல்லை. அப்படியே இரவு நேரத்தில் அங்கு உலவ செல்லும் தைரியமிக்கவர்கள் அடுத்த நாள் காணாமல் போவதாக சொல்கிறார்கள்.

அங்கிருந்து உயிருடன் திரும்பியவர்களிடம் அவர்களின் அனுபவத்தைப் பற்றி கேட்கும் போது, அங்கு மனித நடமாட்டமே இல்லாத வேளையிலும் பேச்சுக் குரல்கள் கேட்பதாகவும், திடீரென்று சிரிப்பு சத்தமும், அழுகை சத்தமும் கேட்பதாகவும் கூறுகின்றனர்.

ஆயிரக்கணக்கில் ஆவிகள் அங்கு இரவு நேரத்தில் உலவுவதாகவும் அங்கிருப்பவர்கள் நம்புகின்றனர். பலரின் உடலை எரித்த சாம்பல் அந்த கடற்கரை மணலில் கலந்ததால் தான் அந்த மண் கருநிறமாக இருக்கிறதென்று ஒரு நாட்டுபுறக் கதையும் அங்குள்ளவர்கள் கூறுகின்றனர்.

தாஜ்மஹால் பேலஸ் ஹோட்டல் (TajMahal Palace hotel, Mumbai)

மும்பை மாநகரின் செழிப்பான இடங்களில் ஒன்றாகும் இந்த தாஜ்மஹால் பேலஸ் ஹோட்டல். பல நாடுகளிலிருந்து வரும் சுற்றுலாவாசிகளை ஈர்க்கும் அதிநவீன ஹோட்டலான இதன் வரலாறு, பயங்கரவாத தாக்குதல், கொலைகள், அமானுஷ்ய நிகழ்வுகள் முதலியவற்றால் கரை படிந்ததாக இருக்கிறது.

இந்த ஹோட்டல் 1903ஆம் ஆண்டு திறக்கப்பட்டது. அன்றிலிருந்து  இன்றுவரை பல முக்கிய பிரபலங்களின் வரவால் இந்த ஹோட்டல் கொண்டாடப்பட்டு வருகிறது. ஆனால் இதே ஹோட்டல், இரண்டாம் உலகப் போரின் போது, இராணுவ மருத்துவமனையாக பயன்படுத்தப்பட்டு வந்தது. அதன் பின், 2008ஆம் ஆண்டு நடத்தப்பட்ட தாக்குதலில் பலரின் உயிரை காவு வாங்கியதும் இங்கு தான்.

இதற்கும் முன் சென்று பார்த்தால், இந்த ஹோட்டலை கட்டும் போது, அதன் தலைமை பொறியாளராக இருந்தவர் சேம்பர்ஸ். (Chambers) இந்த ஹோட்டலின் வரைபடத்திற்கு ஒப்புதல் வழங்கியவர், இங்கிருப்பவர்களை பார்த்துக் கொள்ள சொல்லிவிட்டு, சொந்த வேலைக்காக அவரின் நாட்டிற்கு சென்றார். அவர் இங்கு வந்து பார்த்தபோது, அவர் ஒப்புதல் அளித்த வரைபடத்தில் பெரிய தவறு இருந்ததைக் கண்டு அதிர்ச்சியடைந்தார். அந்த ஹோட்டலின் முகப்பு இருக்க வேண்டிய திசையில் இல்லாமல், எதிர்திசையில் கட்டப்பட்டிருந்தது. பாதி கட்டிமுடித்த கட்டிடத்தை இடித்தும் கட்டமுடியாத சூழ்நிலையில் இருந்தார் அவர். அதுவரை எந்தவொரு தவறுமின்றி பணியாற்றியவருக்கு, இந்த தவறு மிகவும் உறுத்தியதால் அந்த ஹோட்டலின் ஐந்தாம் தளத்திலிருந்து குதித்து தற்கொலை செய்து கொண்டார்.

அப்போதிருந்தே அவரின் ஆவி அங்கு உலவுவதாக அங்கிருக்கும் மக்கள் நம்பினர். பலர் அவரைப் பார்த்தாகவும், அவரின் குரலைக் கேட்டதாகவும் கூறினர்.

இன்னமும் அந்த ஹோட்டலை அவர் கண்காணித்து வருவதாகக் கூறுகின்றனர். ஒருமுறை அங்கிருந்த விலைமதிப்பற்ற பொருளைத் திருட முயன்ற ஊழியரை, அவரின் ஆவி அடித்து மயக்கமுற செய்ததாக அங்கு பணிபுரிபவர்கள் கூறுகின்றனர்.

சேம்பர்சின் ஆவி அங்கு உண்மையிலேயே இருக்கிறதா… இல்லை இது கட்டுக்கதையா… நீங்கள் என்ன நினைக்கிறீர்கள்…

இந்தியாவில் இன்னும் பல இடங்கள் அமானுஷ்ய இடங்களாக கருதப்பட்டு வருகின்றன. அவற்றின் பின்கதைகள் பயமுறுத்துவதாக இருந்தாலும், சிலர் அதை கட்டுக்கதைகளாகவே நம்புகின்றனர். ஆனால், இப்படிப்பட்ட இடங்களைக் காணவே இப்போதைய மக்கள் ஆர்வம் காட்டுகின்றனர்.